Хурофот яке аз падидаҳои номатлуби иҷтимоӣ буда, реша дар ҷаҳолат дорад ва аз насл ба насл интиқол меёбад. Ин боварҳои беасосу носолим бештар дар замоне пайдо мешаванд, ки сатҳи маърифати ҷомеа паст ва дастрасӣ ба илму дониш маҳдуд мегардад.
Мутаассифона, то ҳол баъзе қишрҳои ҷомеа ба хурофот бовар доранд ва онро ба зиндагии рӯзмарраи худ роҳ медиҳанд. Чунин муносибат на танҳо ба пешрафти шахс таъсири манфӣ мерасонад, балки барои рушди ҷомеа низ монеа эҷод мекунад. Хурофот инсонро аз ақлу хирад дур намуда, эътимод ба илм ва донишро коҳиш медиҳад.
Дар даврони муосир, ки илм ва технология бо суръати баланд рушд мекунанд, идомаи чунин боварҳои кӯҳна метавонад ба ҷомеа зарарҳои ҷиддӣ расонад. Вақте ки мардум ба ҷойи муроҷиат ба духтур аз “табобатҳои хурофотӣ” истифода мебаранд, ё ба ҷойи кору заҳмат ба нишастан ва умед бастан ба нишонаву пешгӯиҳо машғул мешаванд, рушди иҷтимоиву иқтисодӣ суст мегардад.
Пешвои миллат, муҳтарам Эмомалӣ Раҳмон борҳо таъкид кардаанд, ки илму маърифат, саводнокӣ ва андешаи солим моро аз ҷаҳолату хурофот раҳо месозанд. Дар ҳақиқат, танҳо дониш ва маърифат қодир аст ҷомеаро ба самти пешрафт ҳидоят намояд. Аз ин рӯ, тарғиби доимии илм, фарҳанг ва арзишҳои миллӣ вазифаи муҳимми ҳар як омӯзгор, рӯҳонӣ ва волидайн мебошад.
Ҷавонон бояд дарк намоянд, ки роҳи саодат дар такя ба дониш, меҳнат ва масъулияти шаҳрвандӣ аст. Донишгоҳҳо, мактабҳо ва марказҳои таълимӣ бояд ба насли наврас омӯзанд, ки хурофот наметавонад зиндагиро беҳтар созад, балки ақлу хирад ва заҳмати содиқона омили асосии муваффақият аст.
Дар баробари ин, масъулияти ҷомеа низ бузург аст. Оила, мактаб ва ҷомеа бояд даст ба даст дода, зеҳни ҷавононро аз хурофот пок нигоҳ доранд ва онҳоро ба илму маърифат ҳидоят кунанд.
Танҳо дар сурати муборизаи ҳамагонӣ бар зидди хурофот ва тақвияти маърифат мо метавонем ҷомеаи мутамаддин, пешрафта ва дорои ояндаи дурахшонро бунёд созем.
Бояд ҳамеша дар хотир дошт, ки ҳар қадам ба сӯи хурофот - як қадам дурӣ аз пешрафт ва нобудии имкониятҳои насли оянда аст.
Алимадонов Ф., мудири бахши
Хадамоти муҳоҷират дар
ноҳияи Қубодиён
